Opportunity for improvement | فرصة التحسين المستمر

التعريف الموضوعى لفرصة التحسين المستمر …

وانا فى بداية دراستى فى دبلوم ضبط وتوكيد الجودة اتعلمت اول درس من دروس التحسين الا وهو ازاى تعرف أنه فيه فرصة التحسين المستمر ..

الدكتور قال بالحرف .. علشان تقدر تعرف الفرصة بشكل دقيق يبقى لازم تتوفر فيها .. ثلاثة نعم .. وثلاثة لا ..
الثلاثة نعم هى :-
١- تكون مرتبطه بالاداء
٢- تكون محددة
٣- تكون قابلة للقياس

الثلاثة لا وهى :-

١- لا تذكر سبب
٢- لا تذكر حل
٣- لا تلومن أحد

ومع الوقت والخبرة والقراءات الكتيير اتضح أنه قدم لينا خلاصة التحسين المستمر بشكل ابسط مما نتخيل .. ولقيت أن الدكتور ديمنج ناقش فى كتابة الفكرة دى تحت مسمى التعريف التشغيلى لأى مشكلة أو موضوع قيد الدراسة Operational Definition .. ومع الوقت لقيت أن التعريف اللى فوق ممكن يجنبنا كوارث كتيير ويقدر يجنبنا مشاكل كتيير اذا اخذنا فى الاعتبار بعض النقاط :-

١- انك تختار مشكلة مش مرتبطة بالاداء أو غير قابلة للقياس زى انها تكون اكتر من مشكلة مع بعض وطبعا تفكيكها لأجزاء بيسهل عملية قياسها بشكل كبير

٢- ثقافة اللوم اللى خلاص أصبحت عرف فى الإدارة المصرية الأ ما رحم ربى وعرفت أن دايما السبب بيكون فى النظام مش فى الأفراد .. يعنى لو فيه خطأ يبقى النظام متصمم غلط وهو اللى سمح بده ولازم نفتش وراء النظام

٣- انك تحل مشاكلك كلها بالفلهوة والخبرة وهنا ممكن تقع فى مصيدة بيسموها مصيدة الخبرة اللى بتخليك تقفز للنتائج بدون الاستناد للحقائق والأدلة ودى من أكبر النقاط اللى أكد عليها ديمنج وقال إن ادارات كتيير بتفشل لو أهملت الحقائق واعتمدت على الحدس والخبرة بس

٤- انك علشان تقدر تحل مشكلة لازم تشوفها بمنظور أنها فرصة وبالتالى هتقدر تاخدها كخطوة للتحسين للأفضل .. مش مجرد انك تلاقى حل وبس… لأ .. انك تقدر تصنع وضع أفضل للجميع

ومع الوقت لقيت فلسفة يابانية قائمة على رؤية أن فى كل مشكلة فرصة التحسين للأفضل .. وانه لو قلنا إنه مفيش مشكلة دى فى حد ذاتها مشكلة كبيرة ومعناها انعدام الرؤية ومفيش بيانات أو تحليل ومفيش قدرة على اقتناص الفرص ( الفرص هنا هى مشكلات فى الفكر التقليدى ) .. وبالتالى التوقف عن التحسين ..

فخليك فاكر ..

لا تلومن أحد
لا تذكر سبب
لا تذكر حل
ويجب أن تكون قابلة للقياس
مرتبطة بالاداء
ومحددة